ომბუდსმენი ნინო ლომჯარია, ნამახვანჰესის მშენებლობის გარშემო არსებულ ბუნდოვანებასა და ადგილზე რიონის ხეობის მოსახლეობის უწყვეტ აქციას Facebook-ით ეხმიანება.
“სახალხო დამცველი მოუწოდებს სახელმწიფო უწყებებს, გაატარონ ყველა შესაძლო ღონისძიება, რათა დასაბუთებული პასუხი გაეცეს ადგილობრივი მაცხოვრებლებისა და დაინტერესებული საზოგადოების ლეგიტიმურ კითხვებს ნამახვანის ჰესების კასკადის პროექტის მოსალოდნელ ზეგავლენასთან დაკავშირებით და არ დაუშვან პროექტის განხორციელება გარემოზე ზემოქმედების ყველა ასპექტის კვალიფიციური და სრულყოფილი შესწავლის გარეშე”, – წერია განცხადებაში
შეგახსენებთ, რომ წყალტუბოს მუნიციპალიტეტში 29-ე დღეა საპროტესტო აქცია მიმდინარეობს. მოსახლეობის თქმით, კაშხლის მშენებლობა 500-ზე მეტ ჰექტარს წყლით დაფარავს. თურქულ კომპანია “ენკას” ადმინისტრაციასთან დღესაც ასეულობით ადამიანია შეკრებილი – ისინი 105-მეტრიანი კაშხლის აშენებას ეწინააღმდეგებიან.