ხაშურის მუნიციპალიტეტის მერი თანამდებობას ტოვებს. გიორგი გურასპაშვილის განცხადება ცოტა ხნის წინ, მუნიციპალიტეტის ფეისბუქ გვერდზე გავრცელდა.
გურასპაშვილი წერს, რომ თანამდებობას “სუბიექტური გარემოებების გათვალისწინებით” ტოვებს და ამბობს რომ “ქართული ოცნების” გუნდის წევრად რჩება, თუმცა ეს უკვე ლირიკაა.
სუბიექტური გარემოებების გათვალისწინებით, ვტოვებ ხაშურის მერის თანამდებობას, რადგან მიმაჩნია, რომ ცხოვრების ამ ეტაპზე, ეს ყველაზე სწორი და დროული ნაბიჯია.
აქვე, ვისარგებლებ შემთხვევით და პირველ რიგში, დიდი მადლობა მინდა გადავუხადო ამომრჩეველს – ჩემს ხაშურელებს გამოჩენილი ნდობისთვის, ასევე, ჩემს თანამშრომლებს, ვისთან ერთადაც ჩვენი ქალაქისთვის არაერთი მნიშვნელოვანი პროექტი განვახორციელე. დარწმუნებული ვარ, ისინი ახლა უკვე ჩემს გარეშე განაგრძობენ ჩვენი ქალაქის განვითარებაზე ზრუნვას.
ამასთანავე, ყოველგვარი პოლიტიკური სპეკულაციების თავიდან ასარიდებლად, ხაზგასმით ვაცხადებ, რომ რა თქმა უნდა, ვრჩები „ქართული ოცნების“ პოლიტიკური გუნდის წევრად – წერს გურასპაშვილი