სოფელ ოირემეს მოსახლეობა წლებია უწყლობას და უგზოობას უჩივის. სოფლის შიდა გზაზე, სადაც ადგილობრივების თქმით, ხელისუფლებამ მხოლოდ გარკვეული მონაკვეთის შეკეთება დაიწყო, ტექნიკამ მუშაობა კარგა ხნის წინა შეაჩერა და მხოლოდ დღეს დილით განაახლა. მოსახლეობა ამბობს, რომ საკუთარ საცხოვრებლამდე მისვლა შემოვლითი გზებით უწევთ, ვერ შემოდის ვერც სახანძრო და ვერც სამაშველო ბრიგადები. ერთ-ერთი ადგილობრივი სოფლის რწმუნებულს პოლიტიკური ნიშნით ზეწოლაში ადანაშულებს და ამბობს, რომ როცა გამგებელს გზის შეკეთების მოთხოვნით მიმართა, გამგებელმა კახა ქობალიამ მას ნაციონალური მოძრაობის პროვოკატორი უწოდა.
ჩვენ სოფლის გამგებელს დავუკავშირდით, კახა ქობალია ამბობს, რომ არანაირ პროვოკაციას მისი მხრიდან ადგილი არ ქონია და ეს ქალბატონი პირიქით უწყობდა პროვოკაციას, თუმცა, რაში გამოიხატებოდა ეს, გამგებელი არ აკონკრეტებს. რაც შეეხება მერიას, უწყებაში ტელეკომპანია „ოდიშს“ განუცხადეს, რომ ზუგდიდში გზის სარეაბილიტაციო სამუშაოები აქტიურად მიმდინარეობს. მათ შორის ოირემეს ადმინისტრაციულ ერთეულში რეაბილიტირდება 200-მეტრი სიგრძის გზა, ხოლო სამუშაოების მომდევნო ეტაპი 2021 წელს განხორციელდება.ამ ეტაპზე ზუგდიდში 55 გზა რეაბილიტირდება, წლის ბოლომდე 70-ზე მეტი ქუჩა მოეწყობა.