თავდამსხმელმა “ოდიშის” ოპერატორს ორჯერ დაუმიზნა და ესროლა [Video]

0
769

ზუგდიდში განვითარებული მოვლენები მსოფლიო მედიის ყურადღების ცენტრში მოექცა. ქალაქის ცენტრში საქართველოს ბანკის ფილიალში შეიარაღებული თავდამსხმელი დაახლოებით 14: 21 წუთზე შევიდა და ადგილზე მძევლები აიყვანა. მოვლენების შუაგულში ტელეკომპანია „ოდიშის“ გადამღები ჯგუფი იმყოფებოდა და ფეისბუკლაივის სიგნალი სწორედ ადგილობრივმა ტელევიზიამ ჩართო. პირველივე წუთიდან ადგილზე იმყოფებოდა „ოდიშის“ გადამღები ჯგუფი. თავდამსხმელმა როგორც ოპერატორი შენიშნა, მას დაუმიზნა და ესროლა. ილია ჯიშკარიანი ამბობს, რომ მისი  მიმართულებით  რომ ისროლა ორჯერ შეიარაღებულმა პირმა, ეს ნათლად დაინახა და რეზინის ტყვიაც წელის არეში მოხვდა. ამ ფაქტს ადასტურებს ერთ-ერთი მძევალი ირაკლი კვარაცხელია, რომელმაც პოლიციაში დაკითხვის შემდეგ მედიასთან კომენტარი გააკეთა და მომხდარის დეტალები გაიხსენა.

მთელი დღის განმავლობაში მოვლენებს ტელეკომპანია „ოდიში“ პირდაპირ  ეთერში ფეისბუკლაივის მეშვეობით გადასცემდა. ჟურნალისტები ცდილობდნენ მოეპოვებინათ ინფორმაცია, თუ რა ხდებოდა იმ ოთახში, სადაც მძევლები იყვნენ გამოკეტილი, თუმცა,ოფიციალური კომენტარი  შსს- ს საღამოს 20:00 საათმდე არ გაუკეთებია, მხოლოდ ერთი ბრიფინგით შემოიფარგლა და მედია გააფრთხილა, რომ პირდაპირ  ეთერში არ ეჩვენებინათ გარეთა პერიმეტრზე სპეცრაზმის მოქმედების არეალი. ხოლო საღამოს ადგილზე მყოფმა შსს მინისტრის მოადგილე ვლადიმერ ბოცვაძემ გააკეთა კომენტარი და განაცხადა, რომ რამდენიმე მძევალი გათავისუფლდა, თუმცა კონკრეტულ დეტალებზე არ უსაუბრია. რამდენიმესაათიანი მოლაპარაკების შემდეგ თავდამსხმელმა შენობა სამხარეო პოლიციის უფროსისა და კიდევ სამი ადამიანის მძევლად აყვანის შემდეგ, გახნილი ხელყუმბარით დატოვა. მედიის კითხვები კი უპასუხოდ დარჩა, რადგან ოფიციალური კომენტარი ისევ ვერ მოიპოვეს ჟურნალისტებმა, მხოლოდ მოგვიანებით უწყების მიერ გავრცელებული განცხადებიდან გაირკვა, რომ თავდამსხმელმა მძევლები ჩხოროწყუს მიმართულებით წაიყვანა და იქვე დატოვა, ხოლო თვითონ გაქვცევა მოახერხა. შეგახსენებთ, რომ მას თავიდანვე ქონდა ულტიმატუმი ხელისუფლებასთან, ის ითხოვდა ნახევარ მილიონ ამერიკულ დოლარს, ასევე უსაფრთხოების დერეფანს და ვერტმფრენს, წინააღმდეგ შემთხვევაში მძევლების დახოცვით იმუქრებოდა. მთელი დღის განმავლობაში ვრცელდებოდა ინფორმაცია, რომ სულ 19 მძევალი ყავდა თავდამსხმელს, თუმცა, სპეცოპერაციის შემდეგ შსს-ს მიერ გავრცელებულ განცხადებაში ნათქვამია, რომ 43 მძევალი იმყოფებოდა ბანკის შენობაში და ყველა მათგანი  უსაფრთხოდ გათავისუფლდა.

წინა სტატიაკორონავირუსის 1 595 ახალი შემთხვევა და ექვსიგარდაცვლილი ბოლო 24 საათის განმავლობაში
შემდეგი სტატია,,სისტემა არის სერიოზულ კრიზისში” -პოლიტიკოსები ზუდიდში განვითარებულ მოვლენებს ეხმაურებიან
ტელეკომპანია ოდიშის საინფორმაციო სამსახური