ივერი მელაშვილსა და ნატალია ილიჩოვას ბრალი ოფიციალურად წაუყენეს. სახელმწიფო ბრალდება საქართველო-აზერბაიჯანის საზღვრის დელიმიტაცია-დემარკაციის კომისიის ორი წევრის მიმართ აღმკვეთ ღონისძიებად პატიმრობას ითხოვს.
პროკურორის მიხეილ სადრაძის განცხადებით, ბრალდებულების ქმედება საქართველოს ტერიტორიიდან მისი ნაწილის გამოყოფისკენ იყო მიმართული.
“მათი პოზიცია არის, რომ არ ეთანხმებიან ბრალდებას, თუმცა ბუნებრივია ეს არის მათი როგორც ბრალდებულების უფლება. ეს არის ბრალდებულების მიერ ჩადენილი განზრახ ქმედება, რომელიც მიმართული იყო საქართველოს ტერიტორიიდან მისი ნაწილის გამოყოფისკენ და მათი დანაშაულებრივი ქმედებების შედეგად, საქართველოს ისტორიული ტერიტორიების, დაახლოებით 3, 500 ჰექტარის მონაკვეთების დაკარგვის საფრთხე შეიქმნა,” – განაცხადა პროკურორმა.