სახელმწიფო უსაფრთხოების სამსახურის უფროსის ყოფილი მოადგილე სოსო გოგაშვილი ადასტურებს, რომ პარტია „ქართულ ოცნებას“ ტოვებს. .
„ბატონ ბიძინა ივანიშვილთან მქონდა პირადი საუბარი და გადავწყვიტე დავტოვო პარტია. მას ავუხსენი წამოსვლის მიზეზები, რასაც პარტიის თავმჯდომარე გაგებით შეხვდა და წარმატებები მისურვა. საზოგადოებისთვის განმარტებებს უახლოეს მომავალში გაკეთებ“, – აცხადებს გოგაშვილი.
სად გააგრძელებს საქმიანობას სოსო გოგაშვილი და უკავშირდება თუ არა მისი გეგმები პოლიტიკას, აღნიშნულთან დაკავშირებით ის ამ ეტაპზე კომენტარს არ აკეთებს და აცხადებს, რომ ამ საკითხზე მომავალში ისაუბრებს.
გოგაშვილის წასვლაზე პარტიიდან ჟურნალისტების თხოვნით დღეს კომენტარი გააკეთა პრემიერმა გიორგი გახარიამ. “საერთოდ არ მაინტერესებს, რა დატოვა, ან სად წავიდა სოსო გოგაშვილი, მიზეზი საერთოდ არ მაინტერესებს და არ ვიცი, საიდან უნდა ვიცოდე?”, — განაცხადა გახარიამ.
ცნობისთვის, სოსო გოგაშვილი „ქართულ ოცნებაში“ მონიტორინგის, კოორდინაციის და ანალიტიკის დეპარტამენტის უფროსი იყო.