“იმედი მაქვს კონფერენსიე უდუმაშვილის და კომკავშირელ ჩიქოვანისგან განსხვავებულად უყურებს ზუგდიდისა და ქვეყნის მომავალს და არც ტრაიბალიზმის კლიშეები აწუხებს.” – ევროპული საქართველოს ერთ-ერთი ლიდერი, ზუგდიდის მაჟორიტარი დეპუტატობის კანდიდატი გიგი უგულავა, ენმ-სა და გაერთიანება ძალა ერთობაშიას მიერ ზუგდიდის მაჟორიტარ კანდიდატად ექიმ მალხაზ ჯალაღონიას წარდგენას ეხმაურება.
წარდგენისას ენმ-ს წევრმა, ზაალ უდუმაშვილმა ჯალაღონიაზე თქვა, რომ “ზუგდიდი, ირჩევს ზუგდიდელს”. უგულავა კი წერს, რომ პარტია “უხერხულად, სამარცხვინოდ გამოიყურება” მაშინ, როცა ამავე პარტიის სახელით წარსულში ზუგდიდის მაჟორიტარად სანდრა რულოვსი იყრიდა კენჭს.
“ზუგდიდი ირჩევს ზუგდიდელსო. სანდრა ელისაბედ რულოვსი ხომ ვერ მეტყვი ზუგდიდის რომელი სოფლიდან ან უბნიდანაა, ჯერ მაჟორიტარი და მერე საერთოდ მერზე რომ იყრიდა კენჭს? თუ ბელადის ოჯახის წევრებს წარმოშობის სერთიფიკატს არ ვუმოწმებთ?
ვერ ხვდებით, რომ უხერხულად სამარცხვინოდ გამოიყურებით, როცა ქოცი ჩიქოვანის მსგავსად იკბინებით. ისე ძალიან კი ემსგავსებით ერთმანეთს”. – წერს უგულავა.
თავდაპირველად, ვრცელდებოდა ინფორმაცია, რომ ერთიანი ნაციონალური მოძრაობის მაჟორიტარი კანდიდატი ზუგდიდში ექსპრეზიდენტ მიხეილ სააკაშვილის დედა, გიული ალასანია იქნებოდა. ამასთან დაკავშირებით, პარლამენტის ვიცესპიკერი გია ვოლსკი ამბობდა, რომ “მეუღლის დაყენება ჯერ კანდიდატად, ახლა დედის დაყენება კანდიდატად, რაღაცა მანია აქვს ამ ადამიანს”