მიუხედავად იმისა, რომ  ტელეკომპანია „ოდიშის“ წამყვანი ლევან თორია ზუგდიდის რაიონულმა სასამართლომ მის მიმართ წარდგენილ ბრალში უდანაშაულოდ ცნო, პროკურატურა  ზუგდიდის რაიონული სასამართლოს მიერ  ლევან თორიას საქმეზე გამოტანილ გამამართლებელ განაჩენს ასაჩივრებს. სასამართლო 2019 წლის 27 დეკემბერს გაიმართა. მოსამართლე ირაკლი აბშილავამ  არ დააკმაყოფილა პროკურატურის მოთხოვნა, თორიას დამნაშავედ ცნობის შესახებ.პროკურატურამ პირველი ინსტანციის გადაწყვეტილება  სააპელაციო სასამართლოში  გაასაჩივრა.  უწყება მიიჩნევს, რომ ბრალდების მხარის მიერ წარმოდგენილი მტკიცებულებით დგინდება ლევან თორიას დანაშაული, რასაც პროკურორ ილია ტორუას თქმით, მოწმეთა ჩვენებები და გამოკვლეული ვიდეომტკიცებულებებიც ადასტურებს.

სასამართლო პროცესი ლევან თორიას საქმეზე ქუთაისის სასამართლოში 14 ოქტომბერს ჩაინიშნა, რომელიც დისტანციურად გაიმართება.

ლევან თორიას  სისხლის სამართლის კოდექსის 126-ე მუხლის პირველი ნაწილით ჰქონდა წარდგენილი ბრალი, რაც ძალადობას გულისხმობს. საქმე ეხება 2019 წლის 14 მაისს, დადიანების ეზოში მომხდარ ინციდენტს, როცა ტელეკომპანია „ოდიშის“ გადამღები ჯგუფი დადიანების ეზოში გადაცემის ჩაწერას აწარმოებდა, სადაც იმყოფებოდნენ გადაცემაში მოწვეული სტუმრები, მათ შორის სანდრა რულოვსი და ნიკოლოზ ვაჩეიშვილი, რა დროსაც რამდენიმე ადამიანი მათ თავს დაესხა და მოხდა ფიზიკური და სიტყვიერი დაპირისპირება.