“სითი მედიქალის” ექიმების მხრიდან 77 წლის პაციენტზე შესაძლო ძალადობის ფაქტზე გამოძიება დაიწყო. ინფორმაციას ამის შესახებ შინაგან საქმეთა სამინისტრო ადასტურებს.

გამოძიება სისხლის სამართლის კოდექსის 126-ე და 187-ე მუხლებით მიმდინარეობს, რაც ძალადობასა და ნივთის დაზიანებას ან განადგურებას გულისხმობს.

ცნობისთვის, 77 წლის ქალის ოჯახის წევრები “სითი მედიქალის” ექიმებს პაციენტზე ძალადობაში ადანაშაულებენ.

„პირდაპირი მნიშვნელობით ძალადობას ვუსვამთ ხაზს, საგამოძიებო უწყება თვითონ იყო შესული და აპირებენ ექსპერტიზასაც. ველოდებით კამერების გახსნას, რომ ნახონ და გადმოგვცენ ინფორმაცია. ჩვენ არ გვიშვებენ კამერებამდე, ასეთი პროტოკოლიაო. მინდა კამერები გაიხსნას, რომ ნამდვილად დამტკიცდეს, რატომ არის ჩალურჯებები“, – განაცხადა პაციენტის ახლობელმა რუსუდან ხარაბაძემ.

აღნიშულ ფაქტს არ ადასტურებს კლინიკა „სითი მედიკალის“ დირექტორი ნიკა მენთეშაშვილი და აცხადებს, რომ ბრალდება სიმართლეს არ შეესაბამება.

„კამერებიდან აიღეს ჩანაწერი. ვინც არ არის აპარატულ სუნთქვაზე, იმან დაადასტურა, რომ არაფერი ყოფილა. მე თვითონ ვუყურე ჩანაწერებს, მე იქ ვერაფერი დავინახე, არ ვიცი პოლიცია რას დაინახავს. სრული პასუხისმგებლობით ვაცხადებ,რომ სიმართლეს არ შეესაბამება ეს განცხადება“, – განაცხადა ნიკა მენთეშაშვილმა.