“სამართლიანი არჩევნებისა და დემოკრატიის საერთაშორისო საზოგადოებამ”, პარლამენტის 2020 წლის არჩევნების წინასაარჩევნო მონიტორინგის მეორე შუალედური ანგარიში წარმოადგინა. ანგარიშში ძირითადად განხილულია 2020 წლის 5 ივლისიდან 3 აგვისტოს ჩათვლით პერიოდი, აგრეთვე მოვლენები, რომელთა განვითარება 5 ივლისამდე დაიწყო.
დოკუმენტის თანახმად, ცალკეულ მუნიციპალიტეტებში შეიმჩნევა ადმინისტრაციულ ერთეულებში მერის წარმომადგენელთა გათავისუფლება, რაც, სავარაუდოდ, უკავშირდება წინასაარჩევნო კამპანიის უფრო ეფექტიანად წარმართვის მიზანს და, ამ პროცესში, მერის წარმომადგენელთა ჩართულობას.
ორგანიზაციის თქმით, მსგავსი ფაქტები ზუგდიდში, მარტვილში, ტყიბულსა და ჭიათურაში დააფიქსირეს.
“სამართლიანი არჩევნების” რეკომენდაციაა, ადგილობრივი თვითმმართველობის ორგანოებმა საქმიანობისას იხელმძღვანელონ ნეიტრალიტეტის პრინციპით. კერძოდ, დაუშვებელია სოფლებში მერის წარმომადგენელთა პარტიული საარჩევნო მიზნით გამოყენება და პოლიტიკურად მოტივირებული საკადრო გადაადგილებები.
ზუგდიდის მუნიციპალიტეტის რვა სოფელში მერის წარმომადგენელთა დათხოვას პოლიტიკურად მოტივირებული უწოდა “ლელოს” ადგილობრივმა ორგანიზაციამ. მისმა ხელმძღვანელ ალექსანდრე ახვლედიანის თქმით, ეს ხდება იმ სოფლებში, სადაც ოპოზიციას მეტი მხარდაჭერა ჰქონდა. მანვე აღნიშნა, რომ ხელისუფლება ცდილობს ჩაანაცვლოს ეს რწმუნებულები ახალი კადრებით, რომლებიც უფრო ეფექტურები იქნებიან ხმების მობილებაზაში წინასაარჩევნოდ.
ცნობისთვის , ზუგდიდის მუნიციპალიტეტის მერიაში ,,ლელოს” ბრალდებებს უსაფუძლო უწოდეს