ზუგდიდისა და ფოთის პოლიციის თანამშრომლებმა ნარკოდანაშაულის ბრალდებით, ლევან ძაძუა დააკავეს. მას დიდი ოდენობით ნარკოტიკული საშუალების შეძენა-შენახვა ედება ბრალად. გამოძიება სსკ-ის 260-ე მუხლით მიმდინარეობს.
ლევან ძაძუა წარსულში კონტრაბანდისთვისაა ნასამართლევი. რამდენიმე თვის წინ კი, ის ოკუპირებული რეგიონიდან, არალიცენზირებული სიგარეტის გადმოტანის მიზნით, დანაშაულებრივი ჯგუფის ორგანიზებისთვის დააკავეს და ამჟამად პირობითი მსჯავრის ქვეშ იმყოფებოდა.
ძაძუა ე.წ. კრიმინალურ ავტორიტეტებთან დაახლოებული უკვე მეხუთე პირია, რომელიც ბოლო 15 დღეში ჩატარებული სპეცოპერაციების შედეგად დააკავეს.
ის „ტყის ძმების“ ლიდერის, დავით შენგელიას დაჯგუფების წევრი და მამა-შვილ შენგელიებთან დაახლოებული პირია.
სამეგრელოში ჩატარებულ სპეცოპერაციას წინ უძღოდა თბილისში, ასევე ნარკოდანაშაულის ბრალდებით, ე.წ. კანონიერი ქურდის, ზურაბ დგებუაძის ბიძაშვილის, კახაბერ დგებუაძის დაკავება.
ლევან ძაძუა ამჟამად თბილისში, წინასწარი დაკავების იზოლატორშია.