ზუგდიდში გზების რეაბილიტაციის პროცესს უნიკალური ხეები ეწირება. რუსთაველის ქუჩაზე, სადაც ამ ეტაპზე წყალსაწრეტი არხის სამუშაოები მიმდინარეობს, იშვიათი დეკორატიული ჯიშის აკაციები განადგურებულია. მძიმე ტექნიკის მუშაობამ ხეების ფესვები მთლიანად დააზიანა და მათი ნაწილი წაქცევის პირასაა.ადგილობრივების ინფორმაციით, არათუ ლამაზდება ტერიტორია, პირიქით, მახინჯდება და მწვანე საფარი კატასტროფის ზღვარზეა. ზუგდიდი-ანაკლიის შიდასახელმწიფოებრივი მნიშვნელობის საავტომობილო გზის რუსთაველის ქუჩის მონაკვეთზე, კერძოდ ჩხოუშიის ხიდიდან ე.წ კუჩხობონის ხიდამდე გზის სავალი ნაწილზე მოძრაობა 10 ივლისიდან 20 ივლისამდე სრულად შეზღუდული იყო. მოსახლეობა ეჭვობს, რომ სამუშაოების დასრულების შემდგომ ქუჩა არათუ აღდგება და გალამაზდება, არამედ სრულად დამახინჯდება და ხეებიც მალე გახმება. შეგახსენებთ, რომ ხეების დარგვა და ქალაქის გამწვანება იშვიათი და უნიკალური ჯიშის დეკორატიული ხეებით წინა ხელისუფლების დროს ადგილობრივი მუნიციპალიტეტის უშუალო ძალისხმევით მოხდა.