კონგრესმენი, ადამ კინზინგერი ეხმაურება ატლანტიკური საბჭოს ციფრული ექსპერტიზის საგამოძიებო ლაბორატორიის კვლევას Twitter-ზე გამოვლენილი იმ ყალბი პროფილების შესახებ, რომლებიც კინზინგერსა და სხვა კონგრესმენებს საქართველოს შიდა საქმეებში ჩარევაში ადანაშაულებდნენ.

კინზინგერი წერს, რომ ამას აკეთებს პუტინი. მისი თქმით, იგი მიზანში იღებს თავისუფალ ადამიანებს და პირადი სარგებლის გამო ქაოსს ხლართავს.

“რუსი ბოტების მიერ Twitter-ზე დატროლვა? ეს ჩვეული სამშაბათია. ამას აკეთებს პუტინი – ის მიზანში იღებს თავისუფლებისმოყვარე ადამიანებს, ცდილობს, რომ ჩაერიოს დემოკრატიულ არჩევნებში და ხლართავს ქაოსს პირადი სარგებლისთვის. საცოდაობაა, მაგრამ, გამარჯობა, ეს პუტინის რეჟიმია”. – დაწერა კინზინგერმა

DFRLab-ის ახალ კვლევაში ნათქვამია, რომ მას შემდეგ, რაც აშშ-ს რესპუბლიკური პარტიის წარმომადგენელმა ადამ კინზინგერმა საქართველოს ხელისუფლება დემოკრატიული ღირებულებების დაუცველობისთვის გააკრიტიკა, ტვიტერის საეჭვო ანგარიშებმა კონგრესმენი ქვეყნის საშინაო საქმეებში ჩარევაში დაადანაშაულა. ერთ-ერთი ანგარიში დიდი ალბათობით დაკავშირებულია ფეისბუქ გვერდთან, ანტილიბერალური დოქტრინა, რომელიც თავის მხრივ ანტი დასავლურ, ანტი ოპოზიციურ და პრორუსულ ნარატივს ავრცელებს.

აღნიშნული ანგარიშების გამოჩენა, რომელთა ნაწილი აშკარად ყალბია, წინ უძღვის საქართველოს საპარლამენტო არჩევნებს, რომელიც 2020 წლის ოქტომბერშია ჩანიშნული.

DFRLab ატლანტიკური საბჭოს ციფრული კვლევის ლაბორატორიაა, რომელიც დეზინფორმაციის იდენტიფიცირებაზე მუშაობს.

ადამ კინზინგერი ანტიდასავლური აქტორების ყურადღების ქვეშ მაშინ მოექცა, როცა მან და სხვა კონგრესმენებმა პრემიერმინისტრ გახარიას წერილი მისწერეს და დაღმავალ ეკონომიკურ ტრენდსა და პოლიტიკურ დევნაზე გაამახვილეს ყურადღება.