საგამოფენო სივრცე და რესტორანი სახელწოდებით „სოფიასთან“, დედა – შვილმა ახალი კორონა ვირუსის გავრცელებამდე ორი კვირით ადრე გახსნეს. რამდენიმე თვიანი პაუზის შემდეგ ეს ადგილი, რომელიც გემოვნებითა და განსაკუთრებულობით გამოირჩევა, დღეს უკვე სტუმრებს მასპინძლობს. აქ შესვლისთანავე თვალში საცემია დახვეწილი ინტერიერი, დიზაინერ სოფია ხარჩილავას მიერ საგულდაგულოდ ძველი ნივთებისგან განახლებული თითოეული დეტალი, მოხატული კედელი ფერადი ორნამენტებით, ჭაღები სხვადასხვა ფორმის ნაჭრებით გაფორმებული, სავარძლები, მაგიდები, სკამები და სხვა ნივთები აღნიშნულ სივრცეში ერთმანეთს სინტეზურად ერწყმის და სტუმრებს საუკეთესო გარემოს უქმნის. ძველი ნივთების ახალი სიცოცხლე – სოფიამ გამოუსადეგარ ნივთებს კრეატიული ახალი დანიშნულება მისცა და სარესტორნო სივრცეში განათავსა, რაც საოცრად ჰარმონიულ განწყობას ქმნის და იზიდავს სტუმარს.