ზუგდიდში, სოფელ ცაიშთან შუაღამეს უცნობმა პირმა ზუგდიდი-თბილისის ავტობუსს ქვა ესროლა და ადგილიდან მიიმალა. კომპანიის წარმომადგენლის დავით დიდიშვილის განცხადებით, უცნობმა პირმა, რომელსაც ნიღაბი ეკეთა, ავტობუსის წინა მინა დააზიანა და ტერიტორია მსუბუქი ავტომობილით მაშინვე დატოვა. მისივე ვერსიით, შესაძლოა ეს მიზანმიმართული ქმედება ყოფილიყო.
შემთხვევის შემდეგ მგზავრები თბილისში სხვა ავტობუსით გადაიყვანეს. ფაქტზე გამოძიება 187-ე მუხლის პირველი ნაწილით დაიწყო, რაც სხვისი ნივთის დაზიანებას ან განადგურებას გულისხმობს.