ზუგდიდში, კომბინატის უბნის ე.წ ვექტორის დასახლებაში, ნგრევად და სიცოცხლისთვის საშიშ კორპუსებში 70-მდე დევნილი ოჯახი ცხოვრობს. საცხოვრებლად უვარგის და ავარიულ შენობაში მცხოვრები დევნილების თქმით, ხელისუფლებას ისინი მხოლოდ წინასაარჩევნოდ ახსენდება. რაც შეეხება დევნილების საცხოვრებელ პირობებს, შენობა თითქმის დანგრევის პირასაა, ზოგიერთ ადგილას კარებისა და ფანჯრების ნაცვლად, ფარატინა ფიცრები და ცელოფნებია აკრული. საპირფარეშო გარეთ დაახლოებით 50 მეტრის მოშორებითაა, რაც განსაკუთრებით პრობლემურია შშმ დევნილი პირებისთვის. ისინი ანტისანიტარიაზეც საუბრობენ და ამბობენ, რომ ეზოში ბავშვების სათამაშოდ გაშვება საშიშია, რადგანაც ყველაფერი მოუწესრიგებელია. დევნილთა უმთავრეს პრობლემად სწორედ გრძელვადიანი განსახლება რჩება. ამ ტერიტორიაზე მცხოვრებ დევნილებს უკვირთ თუ რა კრიტერიუმებით ხდება დევნილთათვის საცხოვრებელი ფართებით უზრუნველყოფა, როცა ისინი წლებია განსაკუთრებით მძიმე მდგომარეობაში მყოფ ობიექტებში ცხოვრობენ. აღნიშნულ საკითხთან დაკავშირებით ზუგდიდის მერიაში განმარტება გააკეთეს და გვითხრეს, რომ ნგრევადი ობიექტების მოკვლევაზე სპეციალურად დევნილთა სააგენტო მუშაობს და პირველ ეპატზე ამ სახის ობიექტებში მცხოვრები დევნილების საცხოვრებელი ფართებით დაკმაყოფილება მოხდება.