ერთიანი ნაციონალური მოძრაობის თავმჯდომარე, გრიგოლ ვაშაძე ამბობს, რომ მისი პარტია გიორგი ვაშაძის კანდიდატურას ისნის მაჟორიტარულ ოლქში “ყველა თავისი რესურსით” დაუჭერს მხარს.
“მუდმივად ისმის შეკითხვა ისნის ოლქზე, მარტივად მინდა ვთქვა – ისანში არის გიორგი ვაშაძის კანდიდატურა, რომელიც გაერთიანებული ოპოზიცია „ძალა ერთობაშიას“ ერთ-ერთი დამფუძნებელია და ესაა ადამიანი, რომელიც 2018 წლის საპრეზიდენტო არჩევნებზე ჩემი შტაბის უფროსი იყო. ერთიანი ნაციონალური მოძრაობა ყველა თავისი რესურსით მას მხარს დაუჭერს”. – თქვა გრიგოლ ვაშაძემ
როგორც ნაციონალური მოძრაობის თავმჯდომარე ამბობს, ოპოზიციამ მაჟორიტარობის კანდიდატებთან დაკავშირებით გავრცელებულ “სპეკულაციებზე” რაც შეიძლება ნაკლები დრო უნდა დახარჯოს.
გიორგი ვაშაძის (ახალი საქართველო) კანდიდატურა ისანში ერთ-ერთია იმ ექვსიდან, რომელიც ოპოზიციურმა პარტიებმა 19 ივნისს წარადგინეს. როგორც ლეიბორისტული პარტიის ოფისში შეკრებილმა ოპოზიციონერებმა მოილაპარაკეს, ისინი ერთმანეთს ამ ექვს ოლქში კონკურენტებს არ დაუყენებენ.