პანდემიის პერიოდში სამეგრელოს რეგიონში სულ უფრო პოპულარული გახდა საკარმიდამო ტერიტორიაზე სათბურების აშენება და შესაბამისად, ბოსტნეული კულტურების მოყვანა. 61 წლის ნაზიკო გოგოხიამ, რომელიც ზუგდიდის რაიონის სოფელ რიყეში ცხოვრობს, პანდემიის პერიოდში სამსახური დაკარგა და გადაწყვიტა შვილთან ერთად საკუთარ ეზოში ვარდების სათბური აეშენებინა. დროთა განმავლობაში ვარდების გარდა, ბოსტნეული კულტურების ჩითილებიც დათესეს და ამ კუთხით რეალიზება უფრო გაუადვილდათ. როგორც დამწყები ფერმერი ქალბატონი ამბობს, ვარდების ჩაბარება გაუჭირდათ, რადგანაც ბოლო პერიოდში ჩასაბარებელმა ფასმა საკმაოდ დაიწია. ფერმერის თქმით, ამჟამად სათბურში 500 ძირი პომიდორი აქვთ დარგული და ამდენივე ძირი სომხური ჯიშის ვარდი, რომლის ნერგებიც სპეციალურად ქარელიდან ჩამოიტანეს. ამის გარდა, ბადრიჯანისა და წიწაკის ნერგები მთლიანად გაყიდეს, რაც პანდემიის პერიოდში მათი ოჯახისთვის შემოსავლის ერთადერთი წყარო იყო. მისივე თქმით, ბადრიჯანი და წიწაკა სითბოს მოყვარული კულტურებია და ერთნაირ პირობებში უფრო ნელა იზრდება, მათი ჩითილების გამოსაყვანად 2-3 კვირაზე მეტია საჭირო. ფერმერი ქალი ჩვენთან საუბარში განმარტავს, რომ სამომავლოდ სასათბურე მეურნეობის გასავითარებლად, რამდენიმე ქალბატონის დასაქმებასაც გეგმავს.