„სამეგრელოს ხმის“ ლიდერმა თენგიზ ჯგუშიამ ზუგდიდში, ქუჩებზე არსებული ვითარება გააპროტესტა. მისი თქმით, პანდემიური სიტუაცია მთავრობისთვის მთავარი მოკავშირე გახდა, რომ მოსახლეობისთვის შეპირებული, უმთავრესად სასიცოცხლო მნიშვნელობის სამუშაოები დათქმულ დროში არ შესრულებულიყო. ჯგუშიამ მოუწოდა მთავრობას, რომ არ დაამთხვიონ ეს ყველაფერი საარჩევნო კალენდარს და ემსახურონ მოსახლეობას ამ კალენდრის გარეშე. “სამეგრელოს ხმის” ლიდერმა ასევე დასძინა, რომ ეს არის მოსახლეობის ჯანმრთელობის აბსოლუტური უგულებელყოფა.
რუსთაველის ქუჩაზე, სადაც ჯგუშიამ ბრიფინგი გამართა, მერიის განმარტებით, სარეაბილიტაციო სამუშაოები მიმდინარეობს, რომელსაც საქართველოს საავტომობილო გზების დეპარტამენტი ახორციელებს. ამასთანავე უწყების ინფორმაციით, ზუგდიდის მუნიციპალიტეტში წლის ბოლომდე 60-მდე საავტომობილო გზა რეაბილიტირდება და მათი თქმით, ისინი ჯგუშიას აბსურდულ ბრალდებებზე კომენტარს არ გააკეთებენ.