სამართალდამცავები თბილისის საქალაქო სასამართლოში, მაგისტრატი მოსამართლის წინაშე გამოკითხავენ „მთავრი არხის“ ჟურნალისტ გიორგი გაბუნიას და არხის დირექტორ ნიკა გვარამიას.

გაბუნიას გამოკითხვა 11 საათზე დაიწყება, გვარამიასი – 13 საათზე. ისინი ჩვენების მისაცემად სახელმწიფო უსაფრთხოების სამსახურში 17 და 18 ივნისს დაიბარეს, თუმცა, ნიკა გვარამიამ და გიორგი გაბუნიამ სასამართლოში გამოკითხვა მოითხოვეს.

15 ივნისს, „მთავარი არხის“ დირექტორმა, ნიკა გვარამიამ განაცხადა, რომ სახელმწიფო უსაფრთხოების სამსახურის მიერ თბილისში დაკავებული რუსეთის მოქალაქე ბოკოვი ჩეჩნეთის მეთაურ კადიროვის დაკვეთით გეგმავდა გიორგი გაბუნიას ლიკვიდაციას. 2019 წლის ივლისში, გაბუნიამ, რომელიც მაშინ „რუსთავი 2“-ის წამყვანი იყო, პირდაპირი ეთერიდან რუსულად აგინა პრეზიდენტ პუტინს.

სახელმწიფო უსაფრთხოების სამსახური საჯაროდ ჯერჯერობით მხოლოდ იმას აცხადებს, რომ ბოკოვი დააკავეს “შეკვეთით განზრახ მკვლელობის მომზადების ფაქტზე დაწყებული სისხლის სამართლის საქმის გამოძიების ფარგლებში, რომელსაც სახელმწიფო უსაფრთხოების სამსახურის კონტრტერორისტული ცენტრი, შესაბამისი ოპერატიული ინფორმაციის საფუძველზე აწარმოებდა“.

სახელმწიფო უსაფრთხოების სამსახური ამ დრომდე არ ამბობს, ვისი მკვლელობა იგეგმებოდა.