დღეიდან არასამთავრობო ორგანიაზაცია „საუნჯე“ ზუგდიდის რაიონის სოფლებში ახალი საპილოტე პროექტის განხორციელებას იწყებს, რაც მიზნად ისახავს შშმ პირებისთვის პანდემიის პირობებში მდგომარეობის გაუმჯობესებას. აღსანიშნავია, რომ რესპირატორული ვირუსები, როგორიცაა კორონავირუსი (COVID-19) ვრცელდება მაშინ, როდესაც ვირუსით დაინფიცირებული ლორწო ან წვეთოვანი ნაწილაკები ხვდება ადამიანის ორგანიზმში თვალების, ცხვირის ან ყელის გზით. ყველაზე ხშირად ეს ხელების მეშვეობით ხდება. გლობალური პანდემიის დროს ვირუსის გავრცელების პრევენციის ყველაზე მნიშვნელოვანი გზა არის ხელების ხშირი დაბანა საპნით და წყლით. როგორც ორგანიზაციის ხელმძღვანელი იაგო ფასანძე აცხადებს, მარტოხელა ხანდაზმულ პირებს და შშმ ოჯახის წევრთან ერთად მცხოვრებ ხანდაზმულ პირებს არა აქვთ ადეკვატური საცხოვრებელი პირობები, რაც ასევე გულისხმობს სასმელ წყალსა და სანიტარიაზე ხელმისაწვდომობის არარსებობას. მისივე განმარტებით, ზუგდიდის რაიონის სოფლებში არ არის ცენტრალური წყალმომარაგება და წყლით უზრუნველყოფა ხდება ხელით გათხრილი ჭიდან, საიდანაც წყლის ამოღება შშმ პირებისთვისა და ხანდაზმულებისთვის პრობლემას წარმოადგენს. როგორც იგი დასძენს, მათი ინიციატივით ასევე მოხდება დევნილთა დასახლებებში წყლის ავზებთან უნივერსალური დიზაინის პრინციპით შშმ პირებისთვის ადაპტირებული გარემოს შექმნას. პროექტი ხორციელდება ევროკავშირის ფინანსური მხარდაჭერით მიმდინარე პროექტის ,,თანაბარი შესაძლებლობები შეზღუდული შესაძლებლობის მქონე პირთათვის – სოციალური სერვისების მიმწოდებლების მხარდაჭერა რეგიონებში“ ფარგლებში, რომელსაც საქართველოს არბაითერ -სამარიტერ ბუნდი ახორციელებს.