20 ივნისის სისხლისღვრიდან ერთი წელი სრულდება – სამოქალაქო აქტივისტების ორგანიზებით, შაბათს, რუსთაველის გამზირზე კვლავ გაიმართება აქცია. ახალგაზრდები, ვინც გასულ წელს ივანიშვილის ხელისუფლებამ სისხლისღვრისა და თვალების დათხრისთვის გაიმეტა, ისევ ერთად დადგებიან.
20 ივნისისთვის ემზადება ხელისუფლებაც და კონტრაქციისთვის ხალხს რეგიონებში აგროვებს. თითოეული სოფლისთვის განსაზღვრულია კვოტა, თუ რამდენი ადამიანი უნდა გაიყვანონ “ოცნების” მხარდამჭერ აქციაზე. განსაზღვრულია ისიც, თუ ვის რამდენს გადაუხდიან.
სამოქალაქო აქტივისტები ამბობენ, რომ მმართველი პარტიის მხრიდან მსგავსი ნაბიჯი მოსალოდნელი იყო.
“იმ ხელისუფლებისგან, რომელსაც პოლიტიკური ფლირტი აქვს კრემლთან გამართული, მოსალოდნელია, რა თქმა უნდა, ყველაფერი… ჩვენ ვიცოდით და წინასწარაც ველით გარკვეულ პროვოკაციებს”, – ამბობს სამოქალაქო აქტივისტი ანა ჭარხალაშვილი.
ოპოზიციის ლიდერები აცხადებენ, რომ ხელისუფლებამ საქართველოში რუსული ხელწერა გადმოიტანა. შაბათის აქციაზე პროვოკაციების მოწყობის შემთხვევაში, ისინი პასუხისმგებლობას მთლიანად მმართველ პარტიას აკისრებენ.
“საზოგადოების პოლარიზაციას ახდენს სწორედ ხელისუფლება და მსგავსი მეთოდებით მუშაობაზე არის საუბარი, როდესაც ბიძინა ივანიშვილს ადანაშაულებენ აშშ-ს შესაბამის პოლიტიკურ წრეებში”, – ამბობს სალომე სამადაშვილი.
შეგახსენებთ, რომ 20 ივნისისთვის დაგეგმილი აქციის მიზანია, ხელისუფლებას შეახსენონ “გავრილოვის ღამეს” დაშვებული შეცდომები.