,,მთავარი არხის” ერთ-ერთი მეწილის გიორგი რურუას ბრალდების სისხლის სამართლის საქმეზე დღეს თბილისის საქალაქო სასამართლოში ბრალდების მხარის 3 მოწმე დაიკითხება.
როგორც რურუას ადვოკატი, დიმიტრი საძაგლიშვილი აცხადებს, 2 მოწმე პოლიციელია, ერთი კი კერძო კომპანიის წარმომადგენელია.
“ბრალდების მხარის სამი მოწმე დაიკითხება, კერძოდ, იმ სამმართველოს უფროსი, კახა მურადაშვილი, რომელმაც გიორგი რურუა დააკავა და იარაღი ჩაუდო. ასევე დაიკითხებიან პოლიციისა და კერძო ორგანიზაციის თანამშრომელი. ამით ამოიწურება ბრალდების მოწმეთა დაკითხვა და შემდეგ უკვე გადავალთ დაცვის მხარის მტკიცებულებათა გამოკვლევაზე. ჩვენი მოლოდინია, რომ კიდევ ერთხელ დადასტურდება გიორგი რურუას უდანაშაულობა და ის გარემოება, რომ გიორგი რურუა ციხეში იმყოფება მხოლოდ იმის გამო, რომ არის “მთავარი არხის” ერთ-ერთი დამფუძნებელი, ანტისაოკუპაციო აქციების აქტიური მხარდამჭერი და მონაწილე. კერძო კომპანიის წარმომადგენლის შენობაზე არის განთავსებული გარესამეთვალყურეო კამერები, სულ ექვსი კამერაა და ერთი კამერა, რომელიც იყურებოდა შემთხვევის ადგილის მიმართულებით, სწორედ ის აღმოჩნდა გაფუჭებული. აღნიშნულთან დაკავშირებით კითხვები გვექნება”, – განაცხადა საძაგლიშვილმა.