ენმს ზუგდიდის ფრაქციის თავმჯდომარის ანა წითლიძის განცხადებით, ზუგდიდის მერის გიორგი შენგელიას გადაწყვეტილებით, ყინულის სახლის მიმდებარე ტერიტორია გაიყიდა. ოპოზიციის ლიდერმა ზუგდიდის რაიონულ პროკურატირაში აღნიშნულთან დაკავშირებით განცხადება შეიტანა და განაცხადა, რომ ზუგდიდის მერსა და m2 შორის კორუფციული გარიგება შედგა, რაც სისხლის სამართლის დანაშაულის ნიშნებს შეიცავს.
წითლიძის ბრალდებებს მერიაში უპასუხეს. გიორგი შენგელიამ ენმ-ს განცხადებას აბსურდული უწოდა.
2019 წელს ზუგდიდის სკეიტ პარკში მდებარე ყინულის სასახლის ტერიტორია სამშენებლო კომპანია m² – მა 7 270 118 ლარად შეიძინა. სადაც კომპანიას 80 ნომრიანი საერთაშორისო სტანდარტების მქონე ბრენდული სასტუმრო უნდა აეშენებინა, ხოლო მერიას აღნიშნულ მიწის ნაკვეთზე განთავსებული შენობა-ნაგებობისა და დანადგარების დემონტაჟი უნდა ეზრუნველეყო. ტერიტორიის გასხვისებას საზოგადოების ნაწილი მხარს არ უჭერდა და ამ მოტივით რამდენჯერმე საპროტესტო აქციაც გაიმართა, თუმცა საკრებულომ ტერიტორია საპრივატიზაციო ნუსხაში ხმაურისა და დაპირისპირების ფონზე შეიტანა.