კორონავირუსის გამო შექმნილი ვითარების ფონზე მკვეთრად გაიზარდა იმ ადამიანების რაოდენობა, ვინც ყოველთვიური შემოსავლის წყარო დაკარგა. ერთ-ერთი ასეთი კულტურის სფეროში დასაქმებული ადამიანები არიან. ზუგდიდელი ქორეოგრაფი მაია გუნია ქართული ცეკვის ხელოვნებას 15 წელია ასწავლის და ანსამბლ „გვრიტების“ სამხატვრო ხელმძღვანელია. მაია ფიქრობს, რომ ანტიკრიზისული გეგმა ძალიან მიზერულია და თან კულტურის მიმართულებით იქ კონკრეტული არაფერია ნათქვამი.
ქორეოგრაფებისთვის უცნობია, რა რეგულაციებს აამოქმედებს მთავრობა და როგორ შეძლებენ რეპეტიციების განახლებას, თუმცა, ახლა რაც ყველაზე ძალიან ენატრება, სწორედ მოსწავლეებთან ურთიერთობა და ცეკვაა.
მთავრობის მიერ წარდგენილი ანტიკრიზისული გეგმის მეექვსე, საბოლოო ეტაპზე გეგმის მიხედვით, ფუნქციონირებას გააგრძელებს: გასართობი, სპორტულ-გამაჯანსაღებელი, შემოქმედებითი საქმიანობა; აზარტული და სხვა მომგებიანი სათამაშო ბიზნესი; სასტუმროები; საგანმანათლებლო დაწესებულებები; ყველა სხვა საქმიანობა (არადისტანციურ რეჟიმში). თუმცა, უშუალოდ კულტურულ საქმიანობაზე არაფერია ნათქვამი და არც პრემიერ-მინისტრი არ აკონკრეტებს როდის მოიხსნება ეს შეზღუდვები. ქორეოგრაფები, რომელთა ფინანსური მდგომარეობაც უშუალოდ ამ საქმიანობაზეა მიბმული, შიშობენ, რომ თუ სტუდიის გახსნის ნება დართეს, ერთ ჯერზე 10 მოსწავლის მეტს ვეღარ შეიყვანენ და საქმიანობის აღდგენას სრულად ვერ შეძლებენ.