ვინ ზრდის ფასებს თვითნებურად საკვებ პროდუქტებზე და რატომ არ არეგულირებს სახელმწიფო ამ საკითხს, ზუგდიდის ბაზარში არც მყიდველებმა იციან და არც გამყიდველებმა. ფასები მომატებულია თითქმის ყველა სახის პროდუქტზე – ახალი კარტოფილი 5 ლარი, ხახვი 4.5 ნახევარი, ლობიო 6- 7 ლარი, ვაშლი 4 ნახევარი ლარი- ესაა მცირე ჩამონათვალი იმ პროდუქტების, რომელიც ოჯახს ყოველდღიურად სჭირდება კვებისთვის და სწორედ ამ პროდუქტების ფასებია იმდენად გაძვირებული, რომ მყიდველებს უკვე მათი ცალობაში ყიდვაც უჭირთ
განახევრებული მყიდველი, გაზრდილი ფასები და უიმედოდ დარჩენილი მოსახლეობა, რომელიც შიმშილისთვისაა განწირული – რეალობამ, რომელიც სახეზეა, შესაძლოა უმძიმესი შედეგები მოიტანოს. ზუგდიდის ბაზარში მოვაჭრეები შიშობენ, რომ ისედაც შემცირებული მყიდველების რაოდენობა კიდევ უფრო შემცირდება და სახლში პურის ფულის გარეშე დაბრუნება მოუწევთ, მყიდველები კი გაძვირებულ პროდუქტებს შემოსავლის სიმცირის გამო ვეღარ ყიდულობენ.