ენგურის ხიდთან მოწყობილ საველე ჰოსპიტალში ექიმები მონაცვლეობით განსაკუთრებულ რეჟიმში მუშაობენ. ჰოსპიტალი აღჭურვილია ყველა საჭირო სამედიცინი პირველადი დახმარების საშუალებებით. კორონა ვირუსის გავრცელების საშიშროების გამო, ექიმები საველე ჰოსპიტალში 24 საათის განმავლობაში მორიგეობენ, ცვლაში ორი ექიმი და ორი ექთანია. ჩვენი გადამღები ჯგუფი მათი მუშაობის პროცესს ადგილზევე გაეცნო. როგორც შპს აფხაზეთიდან იძულებით გადაადგილებულ პირთა ზუგდიდის პოლიკლინიკის ექიმი ნინო ჯახაია ამბობს, ისინი მუშაობას დილის რვა საათიდან იწყებენ და ენგურის ხიდიდან გადმომსვლელ ყველა ადამიანს ამოწმებენ. საველე ჰოსპიტალის მნიშვნელობაზე საუბრობს ექიმი ნოდარ კვირკველია, მისი თქმით, სანამ ეს პანდემია არ გადაივლის, აღნიშნული საველე კარავი მანამდე იფუნქციონირებს. ჩვენი იქ ყოფნის პერიოდში ექიმებს დაუკავშირდნენ და შეაყტობინეს, რომ აფხაზეთიდან ავადმყოფი კაცი გადმოყავდათ, თუმცა ცოტა ხანში გაირკვა, რომ ე.წ მესაზღვრეებმა იგი საბუთების არ ქონის გამო არ გადმოატარეს. ენგურს გაღმა მცხოვრები ქართველების უმეტესობა ბედის ანაბარად არის დარჩენილი.