ზუგდიდის რაიონის სოფელ ინგირში მცხოვრები 72 წლის ციალა ახალაია, რომელსაც სხვადასხვა ჯიშის ვარდი, დაახლოებით, ერთ ჰექტარ მიწის ფართობზე აქვს გაშენებული, დღეს ვარდების რეალიზებას ვერ ახერხებს. მისი თქმით, ბოლო პერიოდში შექმნილმა მდგომარეობამ, ოჯახის ბიზნესს, რომელსაც 35 წელია, რაც აწარმოებენ საფრთხე შეუქმნა. ახალაიები ამბობენ, რომ ისინი სეზონზე, დაახლოებით, 10 ათასი ლარის ყვავილს ყიდდნენ და ეს ოჯახის ძირითადი შემოსავალის წყარო იყო. სათბურების გარდა, მეწარმეს ყვავილების დიდი ნაწილი ღია გრუნტზე მოჰყავს, მათ ძირითადად, ჰოლანდიური ჯიშის ვარდები აქვთ. პანდემიამდე, ოჯახი ვარდების რეალიზაციას, მთელი რეგიონის მასშტაბით ახდენდა. მას შემდეგ, რაც მოძრაობა შეიზღუდა, ოჯახის რძალმა, სამი შვილის დედამ, მაკა კოდუამ ვარდების გაყიდვა ონლაინ გადაწყვიტა, თუმცა როგორც მან ჩვენ გადამღებ ჯგუფთან საუბარში აღნიშნა, ყვავილების დიდი რაოდენობით გაყიდვას მაინც ვერ ახერხებენ. „წელს ძალიან დიდი ზარალი ვნახეთ და არ ვიცით მდგომარეობა როგორ გამოსწორდება“, -ამბობენ ისინი.