მანქანით გადაადგილების გამო დღეიდან არავის დააჯარიმებენ, თუმცა ეს არ ეხება კომენდანტის საათის დროს საშვის გარეშე მოძრაობას. შეზღუდვების შემსუბუქების პირველი ეტაპის მოქმედების დღეს ზუგდიდში განსაკუთრებული მოძრაობა შეინიშნება, ბევრია მსუბუქი ავტომობილი, ასევე ქვეითად მოსიარულეები, ხალხმრავლობაა ბანკებთან, მაღაზიებთან, აფთიაქებთან. ქუჩებში გამოჩნდნენ ტაქსებიც, სამუშაოდ გამოსულ მძღოლებს ეპიდემიოლოგების მითითებების მკაცრად დაცვა ევალებათ. მოქალაქეები შექმნილ პრობლემებზე საუბრობენ და ძირითადად შემოსავლების არქონას ასახელებენ .მათი თქმით, სამუშაოდ გამოვიდნენ, თუმცა ტაქსით სარგებლობის მსურველი თითქმის არავინაა
ქვეყანაში შეზღუდვების ნაწილობრივ მოხსნა პირველი დღეიდან დაიწყო, დაშვებულია მსუბუქი ავტომობილებით გადაადგილება, ტაქსების ოპერირება, ონლაინ ვაჭრობა სრულად, მიტანის სერვისი ნებისმიერ პროდუქტზე, ღია ტიპის აგრარული ბაზრების საქმიანობა. ის სერვისები, რომლებიც პირველ ეტაპზე აღდგება, განხორციელდება მხოლოდ შესაბამისი უწყებების პროტოკოლის მკაცრი დაცვით. პრემიერ-მინისტრის მრჩევლის, ირაკლი ჩიქოვანის განცხადებით, ქვეყანაში ეპიდემიოლოგიური ვითარების დამძიმების შემთხვევაში, შესაძლებელია მთელი ქვეყნის მასშტაბით ხელახლა დაწესდეს და ამოქმედდეს შეზღუდვები.