მთავრობის აკრძალვა მსუბუქი ავტომობილებით გადაადგილებაზე და ზოგადად საზოგადოებრივი ტრანსპორტით მოძრაბის შეწყვეტამ მოსახლეობას პრობლემები შეუქმნა, როგორც ქალაქში, ასევე სოფლად. ადამიანს თუ რაიმე სჭირდება, ან აფთიაქში ან საკვებ პროდუქტებზე წასვლა მას საშუალოდ 7-8 კილომეტრის გავლა მაინც უწევს. მიუხედავად იმისა, რომ სოფლის მაჟორიტარებსა და რწმუნებულებს რეგიონში მცხოვრები მოქალაქეების დახმარება დაევალათ, რაც ავტომობილებით გადაადგილების შეზღუდვის პერიოდში, გადაუდებელი საჭიროების შემთხვევაში სურსათით და მედიკამენტებით მომარაგების საკითხს, ასევე სამედიცინო მომსახურეობასთან დაკავშირებულ გადაადგილებას გულისხმობს, მოსახლეობის ნაწილმა ამის შესახებ არაფერი იცის და ამბობენ, რომ ეს ინფორმაცია მათ არ მიუღიათ.
ზუგდიდის მუნიციპალიტეტის მოსახლეობის თქმით, კორონავირუსის პერიოდში ჩაკეტილ ქალაქებსა და სოფლებში მათი სოციალური და ეკონომიკური მდგომარეობა ძალიან გაუარესდა და მთავრობისგან უფრო მეტ ყურადღებას ითხოვენ.