25 წლის მარიამ შეყილაძე, დაახლოებით ერთი თვეზე მეტია, 15 მოხალისესთან ერთად, ზუგდიდსა და ზუგდიდის რამდენიმე სოფელში ქუჩის მიუსაფარ ძაღლებს პატრონობს. მარიამი „საქართველოს ცხოველთა დაცვისა და გადარჩენის საზოგადოები“- ს წევრია და როგორც მან გვითხრა, კორონა ვირუსის გამო შექმნილი მდგომარეობიდან გამომდინარე გადაწყვიტა ზუგდიდში ჩამოსულიყო და ქუჩის მიუსაფარ ძაღლებზე ეზრუნა. იგი წარმოშობით ზუგდიდელია, თუმცა ბოლო პერიოდში თბილისში ცხოვრობს. კორონა ვირუსის გავრცელებამდეც მარიამი აქ ხშირად ჩამოდიოდა და ქუჩის ძაღლებისთვის სხვადასხვა სახის დაავადებების სამკურნალო წამლები ჩამოქონდა. მარიამი ძაღლებს ყოველდღიურად განსაზღვრულ ლოკაციებზე აკითხავს, რომ ისინი შიმშილით არ დაიხოცონ. მისი თქმით, არსებული გლობალური კრიზისით გამოწვეული პრობლემების ფარგლებში, პროგრამა სახელწოდებით “დავეხმაროთ მიუსაფარს” 20 მარტიდან დაიწყო. როგორც მარიამი ამბობს, ვინაიდან არავინ იცის პანდემიით გმოწვეული კრიზისი და კარანტინი რამდენ ხანს გასტანს, შესაბამისად რთულია პროგნოზი რამდენი ხანი დასჭირდებათ მიუსაფარ ცხოველებს, ასეთი სახის სასიცოცხლოდ მნიშვნელოვანი დახმარება. მარიამს იმედი აქვს, რომ მომავალში კეთილი ადამიანების დახმარებით შეძლებენ ამ პროგრამის გახანგრძლივებას და ზრუნვას ქუჩის მიუსაფარ ძაღლებზე.