ირანში მუშაობა განაახლეს “მცირედი რისკის” ბიზნესებმა, დედაქალაქ თეირანის გამოკლებით, სადაც კორონავირუსის გამო დაწესებული შეზღუდვების შემსუბუქება 18 აპრილიდან დაიწყება, – იუწყება სახელმწიფო საინფორმაციო სააგენტო IRNA.
თეირანს გარეთ მუშაობა განაახლეს სამთავრობო ოფისებმაც, რომელთა თანამშრომლების დაახლოებით ერთი მესამედი შინიდან მუშაობს.
IRNA-ს ინფორმაციით, პრეზიდენტი ჰასან როჰანი ირანელებს მოუწოდებს, კვლავაც მისდიონ ჯანმრთელობის დაცვის წესებს, რადგან ქვეყანა ცდილობს შეაჩეროს ახალი კორონავირუსის გავრცელების ტემპი.
ახლო აღმოსავლეთის ქვეყნებს შორის, ირანი ყველაზე მეტად დააზარალა გლობალურმა პანდემიამ – 70,000-ზე მეტი ინფიცირებული და 4,300-ზე მეტი გარდაცვლილი ადამიანით.
მთავრობა შიშობს, რომ ბიზნესების დიდი ხნით დახურვა და ეკონომიკური აქტივობის შეჩერება დიდ ზარალს მიაყენებს სანქციების გამო ისედაც შეზღუდულ ეკონომიკას. აშშ-მა ირანს ჰუმანიტარული დახმარება შესთავაზა, მაგრამ ირანის ლიდერებმა ამაზე უარი თქვეს და სანაცვლოდ სანქციების მოხსნა მოითხოვეს