ზუგდიდელმა სალომე ფაცაციამ მოხალისეების ჯგუფი შექმნა ხანდაზმულთა დასახმარებლად. ის დიდი ხანია, სოციალურად დაუცველ ოჯახებს სხვადასხვა დახმარებას უწევს, თუმცა Covid-19-ის პანდემიის პირობებში გადაწყვიტა, რომ უფრო მეტია საჭირო
“დავწერე ფეისბუკვერდზე, რომ საჭიროა ასეთ დროს ამოვუდგეთ ამ ადამიანებს გვერდში. გამომეხმაურნენ მოხალისეები და მათი დახმარებით ყოველდღიურ რეჟიმში დავდივართ ბენეფიციარებთან და საჭიროებისამებრ მოგვაქვს საკვები პროდუქტები, მედიკამენტები იქნება, მოვლის საშუალებები, თუ ფინანსური დახმარება.”– გვითხრა მან.
მოხალისეებს ფინანსურად ემიგრანტები და ადგილობრივი ბიზნესმენები უჭერენ მხარს. მოხალისეები ძირითადად დადიან 70-ს გადაცილებულ ადამიანებთან, რომლებსაც საგანგებო მდგომარეობის პირობებში სახლიდან გასვლა ეზღუდებათ.
“თუ არის ადამიანი საწოლს მიჯაჭვული, მაგ შემთხვევაში შევდივართ მასთან (ოთახში), ვტოვებთ საკვებს და გამოვდივართ ხოლო თუ მას შეუძლია გადაადგილება, ჩვეულებრივ კარებთან ვტოვებთ (პროდუქტს) და ვბრუნდებით უკან, რათა დავიცვათ ისინიც და ჩვენც დავიცვათ თავი.“-ამბობს ის.
სალომე ფაცაცია ფიქრობს, რომ მსოფლიო რთული გამოწვევის წინაშე დგას და ასეთ დროს ერთმანეთზე ზრუნვა და კეთილი საქმის კეთება თითოეული მოქალაქის ვალია.