ზუგდიდში აჭარის ტელევიზიის ჟურნალისტების და თანამშრომლების მხარდასაჭერად აქცია გაიმართა. “თავისუფალი მედია შეზღუდვების გარეშე”, „სოლიდარობა აჭარის ტელევიზიის ჟურნალისტებს“ – ამ მოწოდებებით შეიკრიბნენ ჟურნალისტები ზუგდიდის ცენტრალურ ხეივანში. მათი თქმით, ის პროცესები, რაც ხდება აჭარის ტელევიზიაში არის ზეწოლა კრიტიკულ მედიაზე და სიტყვის გამოხატვის თავისუფალებაზე, რაც დაუშვებელია.
„დღეს შევიკრიბეთ ჟურნალისტები იმისთვის, რომ სოლიდარობა გამოვუცხადოთ საზოგადოებრივი მაუწყებლის აჭარის ტელევიზიის საინფორმაციო გუნდს. ის რაც დღეს ხდება იქ, ეს არის ზეწოლა კრიტიკულ მედიაზე, ტავისუფალ სიტყვაზე, სიტყვის გამოხატვის თავისუფლებაზე და ეს არის მნიშვნელოვანი არა მარტო მედიისთვის, არამედ ნებისმიერი ადამიანისთვის, ვისთვისაც ეს ღირებულებები ძვირფასია და სოლიდარობას ვუცხადებთ აჭარის ტელევიზიის საინფორმაციო გუნდს“ – მაია ფიფი, რადიო „ათინათის“ ჟურნალისტი.