20 ივნისის საქმეზე დაკავებულ პირებს დღეს საპროცესო შეთანხმება გაუფორმდებათ. მხარეთა შორის მიღწეული საპროცესო შეთანხმება სასამართლომ უნდა დაამტკიცოს.
გასულ სხდომაზე კახაბერ კუპრეიშვილმა, ცოტნე სოსელიამ და ზურაბ ბუდაღაშვილმა პროკურატურის ყველა მტკიცებულება უდაო გახადეს.
დღევანდელ სასამართლო პროცესზე ბრალდებულები სავარაუდოდ, ბრალსაც აღიარებენ, ვინაიდან ეს საპროცესო შეთანხმების ერთ-ერთი პირობაა. რაც შეეხება კიდევ ერთ დაკავებულს, ბესიკ თამლიანს, ის ბრალს არ აღიარებს და მტკიცებულებებსაც სადაოდ ხდის. მისი საქმე ცალკე წარმოებად მიმდინარეობს.
ცნობისთვის, 20 ივნისის საქმეზე ზურაბ ბუდაღაშვილი, ბესიკ თამლიანი, ცოტნე სოსელია და კახაბერ კუპრეიშვილი არიან დაკავებული. მათ აღკვეთის ღონისძიების სახით პატიმრობა აქვთ შეფარდებული.
დაკავებულ პირებს ბრალი ედებათ ჯგუფურ მოქმედებში მონაწილეობაში, რასაც თან ახლდა რბევა, ძალადობა, სხვისი ნივთის დაზიანება და განადგურება, ასევე ხელისუფლების წარმომადგენლისადმი წინააღმდეგეობა და მათზე თავდასხმა. აღნიშნული ბრალი 4-დან 6 წლამდე ვადით თავისუფლების აღკვეთას ითვალისწინებს.