ტყიბულში, ძიძიგურის სახელობის შახტის 200-ზე მეტი თანამშრომელი პროტესტს აგრძელებს. ისინი ინვესტორს დაპირების შეუსრულებლობაში ადანაშაულებენ და ამბობენ, რომ არაერთი თანხმობის მიუხედავად, ხელმძღვანელობამ სამუშაო პირობები არ გააუმჯობესა.
დასაქმებულები, ასევე, აპროტესტებენ იმ გადაწყვეტილებას, რომლის მიხედვითაც მეშახტეები საკუთარ საქმიანობას, ძიძიგურის ნაცვლად, მინდელის სახელობის შახტში გააგრძელებენ. ეს კი წინაპირობა იქნება იმის, რომ ასობით ადამიანი სამუშაო ადგილის გარეშე დარჩეს, რადგან მეშახტეები შიშობენ, რომ ეკონომიკის სამინისტროს მიერ წარდგენილი ინვესტორი ნაკისრ ვალდებულებებს ვერ ასრულებს და ამ მიზეზით ობიექტის მუშაობას გააჩერებს.
ასევე, მეშახტეების განმარტებით, მათი მინდელის შახტში გადასვლა დამატებით საფრთხეებს შეუქმნის დასაქმებულებს, რადგან აღნიშნულ შახტში ტექნიკურმა გაუმართაობამ არაერთი ტრაგედია გამოიწვია.
მეშახტეები მოითხოვენ, რომ მუშაობა კვლავ ძიძიგურის სახელობის შახტში გააგრძელონ.