„ბატონი გიორგი, გაზაფხულს დაველოდოთო რომ ბრძანა, ალბათ გულისხმობდა იმას, რომ დაველოდოთ გაზაფხულს, აყვავდება ია“, – ამ სიტყვებით გამოეხმაურა საქართველოს იუსტიციის მინისტრი თეა წულუკიანი პრემიერ-მინისტრის, გიორგი გახარიას კომენტარს.

„დაელოდეთ გაზაფხულს“, – ამ მოკლე კომენტარით უპასუხა 23 თებერვალს გიორგი გახარიამ ჟურნალისტებს კითხვაზე, განხორციელდება თუ არა სამთავრობო ცვლილებები ქვეყანაში.

„არ ვიცი, რა კონტექსტში იყო ნათქვამი“, – აღნიშნა, თავის მხრივ, პრემიერ-მინისტრის ამ განცხადების პასუხად ჟურნალისტებთან კომენტარში თბილისის მერმა კახა კალაძემ. მისი თქმით, სამთავრობო ცვლილებებზე გუნდში ამ ეტაპზე არ მსჯელობენ:

„ამ ეტაპზე არანაირ ცვლილებებზე საუბარი არ არის. ქვეყანას ჰყავს ძლიერი პრემიერ-მინისტრი, ჰყავს მთავრობა, რომლებიც მუშაობენ ყოველდღიურ რეჟიმში. არ ყოფილა მსჯელობა ამასთან დაკავშირებით… ჩვენ გვყავს პრემიერი გიორგი გახარია , რომელიც არის ძლიერი პრემიერ-მინისტრი და ყოველდღიურად მუშაობენ იმისთვის, რომ უპასუხონ იმ გამოწვევებს, რომლებიც გვაქვს ქვეყანაში“, – განაცხადა კახა კალაძემ რადიო თავისუფლების ჟურნალისტის შეკითხვის პასუხად.

მედიაში ბოლო დროს ვრცელდება ინფორმაცია, რომ გიორგი გახარიას პრემიერ-მინისტრის პოსტზე სახელმწიფო უსაფრთხოების სამსახურის უფროსი გრიგოლ ლილუაშვილი შეცვლის.