„ევროპული საქართველოს“ ერთ-ერთი ლიდერის გიგი უგულავას დაპატიმრების განაჩენთან დაკავშირებული გარემოებები ხელს უშლის პოლარიზაციის აღმოფხვრისთვის აუცილებელ დიალოგს” – ასე გამოეხმაურა ევროკავშირი გიგი უგულავას დაპატიმრების ფაქტს. სპიკერის სახელით გამოქვეყნებულ განცხადებაში ხაზგასმულია საქართველოს მნიშვნელოვანი ვალდებულებები: სასამართლოს დამოუკიდებლობა, სამართლიანი მართლმსაჯულება და კანონის უზენაესობა.
„ევროკავშირი ყურადღებით სწავლობს საქართველოს უზენაესი სასამართლოს ბოლო გადაწყვეტილებას ოპოზიციის ლიდერის, გიგი უგულავას საქმეზე.
ამ განაჩენთან დაკავშირებული გარემოებები ხელს არ უწყობს პოლიტიკური დიალოგის გაგრძელებას, რომელიც გამიზნულია მეტად საჭირო დეპოლარიზაციისთვის, საქართველოში არსებულ სიტუაციაში.
სასამართლოს დამოუკიდებლობის უმაღლესი სტანდარტების დაცვა, სამართლიანი მართლმსაჯულება და კანონის უზენაესობა წარმოადგენს საქართველოს არსებით ვალდებულებას ევროკავშირ-საქართველოს ასოცირების შეთანხმების ფარგლებში.
ევროკავშირი გააგრძელებს ასევე ყველა სხვა მნიშვნელოვან საქმესთან დაკავშირებული სასამართლო პროცესების მონიტორინგს“, – ნათქვამია ევროკავშირის განცხადების ტექსტში.