განათლების, მეცნიერების, კულტურისა და სპორტის სამინისტროს სპეციალურ გვერდზე დღეს დაიწყო და 17 თებერვლის ჩათვლით გაგრძელდება სკოლის დირექტორობის მსურველთა რეგისტრაცია.
მსურველი უნდა შევიდეს ვებგვერდზე: https://directors.mes.gov.ge/
კონკურში მონაწილეობის მიღება შეუძლია უმაღლესი განათლების მქონე პირს, რომელსაც მუშაობის არანაკლებ 3 წლის გამოცდილება, აქედან, განათლების სფეროში სწავლების არანაკლებ ერთი წლის სტაჟი აქვს.
ტესტირების პროგრამა რამდენიმე მიმართულებას მოიცავს – საკანონმდებლო ბაზა, სასწავლო პროცესის ორგანიზება, მონიტორინგი და შეფასება, სკოლის ადამიანური რესურსების მართვა, ეფექტური კომუნიკაციისა და მოტივაციის მეთოდები, მშობლებთან მუშაობა და ანგარიშვალდებულება, ლოგიკური მსჯელობა და ინფორმაციის ანალიზი და სხვა.
ტესტირება ჩატარდება ელექტრონული ფორმით. კონკურსანტის კომპეტენცია და უნარები წარმატებით დაძლეულად ჩაითვლება ტესტის მაქსიმალურ ქულათა 60%-ის დაგროვების შემთხვევაში. შეფასება განხორციელდება ტესტის დასრულებისთანავე. ტესტირებისათვის დადგენილი მინიმალური კომპეტენციის ზღვრის გადალახვის შემთხვევაში, კონკურსანტს საშუალება ეძლევა გადავიდეს გასაუბრების ეტაპზე“, – აღნიშნულია ინფორმაციაში.
ტესტირების ჩატარების განრიგი, ინფორმაცია ტექსტის სტრუქტურის შესახებ და მოსამზადებლად საჭირო ლიტერატურის ნუსხა, სამინისტროს ოფიციალურ ვებგვერდზე წინასწარ განთავსდება.