ზუგდიდის რაიონული პროკურატურა ზუგდიდის რაიონული სასამართლოს მიერ ტელეკომპანია „ოდიშის“ წამყვან ლევან თორიას საქმეზე გამოტანილ გამამართლებელ განაჩენს ასაჩივრებს. პროკურატურამ პირველი ინსტანციის გადაწყვეტილება  სააპელაციო სასამართლოში  გაასაჩივრა.  უწყება მიიჩნევს, რომ ბრალდების მხარის მიერ წარმოდგენილი მტკიცებულებით დგინდება ლევან თორიას დანაშაული, რასაც პროკურორ ილია ტორუას თქმით, მოწმეთა ჩვენებები და გამოკვლეული ვიდეომტკიცებულებებიც ადასტურებს.

ტელეკომპანია „ოდიშის“ წამყვანი ლევან თორია ზუგდიდის რაიონულმა სასამართლომ მის მიმართ წარდგენილ ბრალში უდანაშაულოდ ცნო. სასამართლო 2019 წლის 27 დეკემბერს გაიმარტ. მოსამართლე ირაკლი აბშილავას გადაწყვეტილებით, ლევან თორიას გირაოს სახით გადახდილი 3000 ლარი უკან დაუბრუნდება. მოსამართლემ არ დააკმაყოფილა პროკურატურის მოთხოვნა, თორიას დამნაშავედ ცნობის შესახებ.

ლევან თორიას  სისხლის სამართლის კოდექსის 126-ე მუხლის პირველი ნაწილით ჰქონდა წარდგენილი ბრალი, რაც ძალადობას გულისხმობს. საქმე ეხება მიმდინარე წლის 14 მაისს, დადიანების ეზოში მომხდარ ინციდენტს, როცა ტელეკომპანია „ოდიშის“ გადამღები ჯგუფი დადიანების ეზოში გადაცემის ჩაწერას აწარმოებდა, სადაც იმყოფებოდნენ გადაცემაში მოწვეული სტუმრები, მათ შორის სანდრა რულოვსი და ნიკოლოზ ვაჩეიშვილი, რა დროსაც რამდენიმე ადამიანი მათ თავს დაესხა და მოხდა ფიზიკური და სიტყვიერი დაპირისპირება.