აფხაზეთის, სოფელ საბერიოდან დევნილი 18 წლის მათე ჯომიდავა, რომელსაც თბილისში, გასული წლის 30 დეკემბერს ოთხი პირი დაესხა თავს, 21 იანვარს მეცხრე საავადმყოფოში გარდაიცვალა. ინფორმაციას ამის შესახებ ,,პრაიმ ტაიმი” ავრცელებს.

პრაიმტაიმის ჟურნალისტის თეა შონიას ინფორმაციით, გარდაცვლილის ცხედარი ექსპერტიზის ბიუროშია გადასვენებული. ოჯახი ინციდენტში მონაწილე პირების დაკავებას და საქმის უსწრაფესად გამოძიებას ითხოვს.

მათე ილიას უნივერსიტეტში სწავლობდა და პარალელურად რუსთაველის გამზირზე მდებარე „სპარში“ მუშაობდა.

როგორც ოჯახის ახლობელი „პრაიმტაიმს“ უყვება, 30 დეკემბერს მათეს 4 პირთან მოუვიდა შელაპარაკება.„გულუბრყვილო ბავშვი მარტო აღმოჩნდა იმ ყაჩაღების წინაშე, შეეწინააღმდეგა, არავინ არ მიეშველა, როგორც ვიცით, და შემდეგ ისინი გარეთ გამოვიდნენ, აიღეს ტროტუარის დასაგები ფილა და მათეს თავში ჩაარტყეს. 20 დღე უგონოდ იყო და გარდაიცვალა დღეს. ამას ჩვენ ოჯახი არ დათმობს, რა დააშავა ასეთი, ასე რომ გაიმეტეს. ვიცით რომ დამნაშავე პირი ყველა თავისუფალია“,- უთხრა „პრაიმტაიმს“ ოჯახის ახლობელმა.

მისივე ინფორმაციით, ვინაიდან მათეს ოჯახი ოკუპირებული აფხაზეთიდანაა, მის ცხედარს რამდენიმე დღით ზუგდიდის მუნიციპალიტეტში დაასვენებენ და შემდეგ მშობლიურ საბერიოში დაკრძალავენ.

„ჩვენ დიდი სანათესაო გვაქვს, მათეს დედა და ძმა საბერიოში არიან… მთელი რაიონი დასტირის უკეთილშობილეს ბიჭს. დაკრძალვაზე ვერ ჩავა ხალხი, ხიდზე ვინ გაატარებს საბუთების გარეშე. აქ დაიტირებენ რამდენიმე დღე ზუგდიდის რაიონში“,- ამბობს ჯომიდავების ოჯახის ახლობელი.

შსს-ს მიერ 30 დეკემბერს გავრცელებული ინფორმაციით, მომხდართან დაკავშირებით აღძრულია სსკ-ის საქმე და დაკავებულია ერთი პირი.