ეროვნულ დემოკრატიული ინსტიტუტის ახალი კვლევის მიხედვით, ხვალ რომ საპარლამენტო არჩევნები ტარდებოდეს, გამოკითხულთა 20% ქართულ ოცნებას მისცემდა ხმას, 13% – ერთიან ნაციონალურ მოძრაობას, 8% – ევროპულ საქართველოს, 5% – ლეიბორისტულ პარტიას, 4% – პატრიოტთა ალიანსს, 3-3% – ახალ საქართველოს და ერთიან საქართველოს, ხოლო 2% – გირჩს. გამოკითხულთა 14% აცხადებს, რომ არც ერთ პარტიას მისცემს ხმას, ასევე 14% პასუხზე უარს ამბობს, ხოლო 12%-მა არ იცის.
NDI-მ გამოკითხვა ახალი მეთოდით ჩაატარა – რესპონდენტს მისცა პლანშეტი, სადაც გამოკითხულმა თავად მონიშნა პასუხი. ჩამონათვალი იმ პარტიებისგან შედგებოდა, ვინც წინა კვლევაში 1%-მა მაინც დაასახელა.
რაც შეეხება ძველ მეთოდს, როცა კითხვაზე უნდა ეპასუხათ, 22% ამბობს, რომ ხმას ქართულ ოცნებას მისცემს, 13% – ენმ-ს, 4% – ევროპულ საქართველოს, 1% – ლეიბორისტულ პარტიას, 17% – არც ერთი პარტია, 24% – “არ ვიცი”, ხოლო 8% – უარი პასუხზე.
ასევე, კვლევის მიხედვით, ხვალ რომ არჩევნები ტარდებოდეს, მასში მონაწილეობას გამოკითხულთა 65% მიიღებდა. აქედან 49%-ს გადაწყვეტილი აქვს ვის მისცემს ხმას, ხოლო 48%-ს – არა.
NDI-ის გამოკითხვის მიხედვითვე (ახალი მეთოდით), გამოკითხულთა 20%-ის შეხედულებებთან ახლოს არც ერთი პარტია არ დგას. 19% ქართულ ოცნებას ასახელებს, 13% – ენმ-ს, 7% – ევროპულ საქართველოს, 6% – ლეიბორისტულ პარტიას, 5% – პატრიოტთა ალიანსს, 4% – ახალ საქართველოს, 3% – ერთიან საქართველოს, 2% – გირჩს. 14% პასუხზე უარს ამბობს, ხოლო 6%-მა არ იცის, რომელი პარტია დგას მის შეხედულებებთან ახლოს.
რაც შეეხება ძველ მეთოდს, თავის შეხედულებებთან ყველაზე ახლოს მდგომ პარტიად ქართულ ოცნებას 21% ასახელებს, ენმ-ს – 14%, ევროპულ საქართველოს – 6%, ლეიბორისტულ პარტიას – 2%, არც ერთ პარტიას – 37%.
NDI-ის დაკვეთით საველე სამუშაოები 19 ნოემბრიდან 13 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით) ჩატარდა. კვლევა ეყრდნობა 2,181 პირისპირ ინტერვიუს წარმომადგენლობითი შერჩევის საფუძველზე. საშუალო ცდომილების ზღვარი 1.9%-ია.
NDI-ის კვლევები დიდი ბრიტანეთის მთავრობის UK aid-ის მხარდაჭერით ფინანსდება. საველე სამუშაოები CRRC–საქართველომ ჩაატარა.თემები:
