დღეს ენგურის ხიდზე უჩვეულო ხალხმრავლობა იყო. ახალი წლისთვის საჭირო პროდუქტებს, აფხაზეთში მცხოვრები ქართველი მოსახლეობა ძირითადად ენგურს გამოღმა ყიდულობს. როგორც ისინი ჩვენთან საუბარში განმარტავენ, გაცილებით უფრო იაფი ღირს პროდუქტები ზუგდიდის ბაზარში და შესაბამისად ხიდის გადაკვეთა სწორედ ამიტომ უწევთ. თუმცა ბევრია ისეთი, რომლებიც დევნილობის გამო სხვადასხვა რაიონის კომპაქტურ ცენტრებში ამ დრომდე ცხოვრობენ და ახალი წლისთვის ცდილობენ ოჯახის წევრები ტრადიციულად ახალი წელს აფხაზეთში შეხვდნენ. ჩვენ რამდენიმე მათგანს ენგურის ხიდზე გავესაუბრეთ, თითქმის ერთკილომეტრიანი ხიდი დღეს განსაკუთრებით ხალხმრავალი იყო. ორ ათეულ წელზე მეტია, ენგურის ხიდი დროებით გამყოფ ხაზად იქცა აფხაზეთსა და დანარჩენ საქართველოს შორის. ენგურს გაღმა მცხოვრები ქართველების საახალწლო სურვილი გამთლიანებულ საქართველოსა და მშვიდობასთან ასოცირდება.