პრეზიდენტმა სალომე ზურაბიშვილმა და მისმა ადმინისტრაციამ 2019 წლის 10 თვეში მივლინებებში 1 400 000 ლარზე მეტი დახარჯა. –  სამივლინებო ხარჯების შესახებ საჯარო ინფორმაცია „ინტერპრესნიუსმა“ პრეზიდენტის ადმინისტრაციისგან გამოითხოვა.

10 თვეში პრეზიდენტის ადმინისტრაციას სხვადასხვა ქვეყანაში დაახლოებით 40-მდე ვიზიტი აქვს განხორციელებული, რაშიც 1 417 534 ლარი დაიხარჯა. უშუალოდ პრეზიდენტ სალომე ზურაბიშვილის სამივლინებო ხარჯები 341 800 ლარს შეადგენს.

ყველაზე მეტი თანხა პრეზიდენტს და მის ადმინისტრაციას აშშ-ში ვიზიტის დროს აქვს დახარჯული. აშშ-ში ვიზიტის განმავლობაში, უშუალოდ პრეზიდენტის სამივლინებო ხარჯი 144 616 ლარს შეადგენს, ადმინისტრაციის დანარჩენმა თანამშრომლებმა კი, აშშ-ში, ამავე ვიზიტის პერიოდში, 131 845 ლარი დახარჯეს. აშშ-ის შემდეგ ყველაზე მოცულობითი თანხა პრეზიდენტმა და მისმა ადმინიტრაციამ საფრანგეთში, პარიზში ვიზიტისას დახარჯეს (85 297.45 ლარი). ყველაზე მცირე თანხა კი დანიაში, კოპენჰაგენში ერთდღიანი ვიზიტისას დაიხარჯა და ის 2 279 ლარს შეადგენს.

აღნიშნული ხარჯები 2019 წლის იანვრიდან ოქტომბრამდე პერიოდს მოიცავს.