თბილისის მერიის ინფორმაციით, დღეს, 25 დეკემბერს, 20:00 საათზე პირველი რესპუბლიკის მოედანზე დედაქალაქის მთავარი ნაძვის ხე საზეიმოდ აინთება.
ღონისძიებას დაესწრება თბილისის მერი კახა კალაძე. რესპუბლიკის მოედანზე საახალწლო სოფელი 13 იანვრის ჩათვლით იფუნქციონირებს.
თბილისის მერი, კახა კალაძე ნაძვის ხის ანთებაზე ყველას ეპატიჟება, “განურჩევლად პოლიტიკური შეხედულებებისა”.
“მინდა დავპატიჟო ყველა, აბსოლუტურად ყველა, განურჩევლად პოლიტიკური შეხედულებებისა. მობრძანდით, ცოტა ხანი გვერდზე გადადეთ თქვენი პოლიტიკა, წამოიყვანეთ თქვენი შვილები, შვილიშვილები. მთავრობის წევრებსაც გეხებათ ეს. თბილად ჩაიცვით, ცოტა ცივა. საკმაოდ საინტერესო ღონისძიება იქნება, იქნება ნაძვის ხის ანთების ოფიციალური ცერემონია, რომელიც დატვირთული იქნება თეატრალური წარმოდგენით”, – თქვა კალაძემ თბილისის მთავრობის სხდომის დაწყებამდე.