საქართველოს სახალხო დამცველის სპეციალური პრევენციული ჯგუფის მიერ მოპოვებული ინფორმაციის თანახმად, პენიტენციურ დაწესებულებებში არ არის ძალადობისგან თავისუფალი გარემო, რაც ვლინდება პატიმართა შორის ფიზიკურ და ფსიქოლოგიურ ძალადობაში, ციხის კრიმინალური სუბკულტურის არსებობასა და დეესკალაციის, სამარტოო, შიდა კლასიფიკაციის საკნების ხანგრძლივად, არამიზნობრივად დასჯის მიზნით გამოყენებაში.
4 პენიტენციურ დაწესებულებაში ჩატარებული მონიტორინგის საფუძველზე მომზადებულ ანგარიშში სახალხო დამცველი მიუთითებს, რომ დაწესებულებები გადატვირთულია, შეიმჩნევა პერსონალის ნაკლებობა, რის გამოც ადმინისტრაციას აქვს ცდუნება, „წესრიგის შენარჩუნების“ და კონფლიქტის მოგვარების ფუნქცია არაფორმალურ მმართველებს გადააბაროს.
ანგარიშში აღნიშნულია, რომ ის დაწესებულებები, სადაც მაღალია „არაფორმალური მმართველობის გავლენა, პატიმართა შორის ფიზიკური და მძიმე ფსიქოლოგიური ძალადობით ხასიათდება. კერძოდ, ფსიქოლოგიური ძალადობა ძირითადად გამოძალვაში, დამცირებაში, გარიყვასა და სხვა ქმედებაში გამოიხატება.
ანგარიშში აღნიშნულია, რომ პატიმრები სათანადოდ არ იცნობენ საკუთარ უფლება-მოვალეობებს და კრიმინალური სუბკულტურის გავლენითა და რეპრესიის შიშით უარს ამბობენ საჩივრის უფლების გამოყენებაზე.
ანგარიშში მითითებულია, რომ ცალკეული გამონაკლისების გარდა, პატიმრებს სახალხო დამცველის წარმომადგენლებთან არ უსაუბრიათ ციხის თანამშრომელთა მხრიდან პატიმრებზე ფიზიკურად ძალადობის ფაქტებზე. მათ მონიტორებთან ძირითადად ფსიქოლოგიურ ძალადობასა და არაეთიკურ მიმართვებზე ისაუბრეს.
საქართველოს სახალხო დამცველის სპეციალურმა პრევენციულმა ჯგუფმა 2019 წლის ივლისისა და აგვისტოს თვეში N2, N8, N14 და N15 პენიტენციური დაწესებულებების მონიტორინგი ჩაატარა. ვიზიტები განხორციელდა ყველაზე დიდ ნახევრად ღია ტიპის თავისუფლების აღკვეთისა და დახურული ტიპის პატიმრობის და თავისუფლების აღკვეთის დაწესებულებებში.