სოფელ მამათისა და აცანის საზღვარზე ხანძრის ლოკალიზება ვერ მოხერხდა. საგანგებო სიტუაციების მართვის სამსახურში აცხადებენ, რომ ხანძრის კერები მეტისმეტად მიუდგომელ ადგილზეა.
ამ წუთებში მიმდინარეობს გზების ძიება, საიდან შესაძლებელი იქნება ცეცხლის ლოკალიზებაზე მუშაობა.
ადგილზე მობილიზებული არიან სატყეო, სახანძრო და სამაშველო სამსახურები. ხანძრის კერები დასახლებული პუნქტისგან შორსაა.
ცეცხლი გვიან ღამით, ბალახის საფარს გაუჩნდა. იგი მიწაზე დაყრილ ხმელ ფოთლებსა და ბუჩქებს მოედო , თუმცა მდგომარეობა საგანგაშო ნამდვილად არ არის, მიუხედავად იმისა, რომ ქარიანი ამინდია, წელიწადის დროის ამ მონაკვეთში გამორიცხულია ცეცხლი უშუალოდ ხეებს მოედოს.
ხანძრის გამომწვევი მიზეზი უცნობია. შსს-ს ინფორმაციით, გამოძიება უკვე დაწყებულია და სისხლის სამართლის კოდექსის 187-ე მუხლის მეორე ნაწილით მიმდინარეობს.
აღსანიშნავია, რომ ლანჩხუთში ბოლო სამი დღის შუალედში, ტყის მასივში ხანძრის გაჩენის ეს უკვე მეორე შემთხვევაა. 25 იანვრის ღამეს აგარაკის მთის ფერდობზე ჰქონდა ადგილი ანალოგიურ ფაქტს.