2019 წლის 20 დეკემბერს, სოციალურმა ქსელმა „ფეისბუქ“-მა საკუთარი პლატფორმიდან წაშალა ასობით ქართული ანგარიში, „დღეს, ჩვენ წავშალეთ 39 ფეისბუქ ანგარიში, 344 გვერდი, 13 ჯგუფი და 22 Instagram-ის ანგარიში, როგორც წარმოქმნილი შიდა-ფოკუსირებული ქსელი საქართველოში“.
ამ ფაქტს ეხმაურება მმართველი პარტიის წევრი, დეპუტატი კარლო კოპალიანი და ეჭვობს, რომ ეს არის „აქედან მიწოდებული ინფორმაცია“ და „ერთ-ერთი ხერხია „ქართულ ოცნებასთან“ საბრძოლველად“.
„დამისახელეთ, რომელიმე ჯგუფი, რომელიც „ფეისბუქმა“ გააუქმა და რომელზეც დამტკიცდა, რომ ანტიდასავლურ პროპაგანდას ავრცელებდა. თუ მსგავსი რამ იყო, ვეთანხმები, რომ უნდა გაუქმდეს, მაგრამ ეს გაუქმება უნდა მოხდეს ორმხრივად. როდესაც პროდასავლურობაზე გაქვს პრეტენზია და უზარმაზარ ოპოზიციურ გაერთიანებას ქმნი, მაგ გაერთიანების წევრები მოსკოვში არ უნდა დარბოდნენ. აი, სად არის პროდასავლურობის ღალატი და ვინ არიან პრორუსები, აღარ ვლაპარაკობ მათ თავმჯდომარეზე პოლკოვნიკ ვაშაძეზე. ამიტომ „ფეისბუქის“ პატრონს, თუ ვინც არის, ვურჩევ, რომ ორმხრივად იმოქმედოს ასეთ შემთხვევებში. თუმცა ეჭვი მაქვს, რომ ეს აქედან მიწოდებული ინფორმაცია იყო და ეს ერთ-ერთი ხერხია „ქართულ ოცნებასთან“ საბრძოლველად, მაგრამ ეს არ გამოუვათ. „ფეისბუქმა“ რეაგირება გააკეთა იმაზე, რა ინფორმაციაც მიიღო. ისეთი გვერდებია გაუქმებული, რომელთა 90% რეალურია,“ – განაცხადა კარლო კოპალიანმა.
ავტორი: სალომე ჯოლოგუა