“ამ ცხოვრების დედაც, თქვენი სამართლის დედაც”, – ფურცელზე დაწერილი ეს სიტყვები 20 ივნისის საქმეზე დაკავებულმა ბესიკ თამლიანმა სხდომათა დარბაზში იმ ადგილას გადმოფინა, სადაც ბრალდებულები სხედან.
აღნიშნული წარწერა მანდატურისა და ესკორტის ოფიცრების სამსახურის თანამშრომლებმა მოახსნევინეს.
“სოლიდარობა გამოვუცხადე, თურმე, ესეც არ შეიძლება. რა მოხდა ყოფილიყო”, – განაცხადა თამლიანმა.
აღნიშნულთან დაკავშირებით კი, მოსამართლე ალექსანდრე იაშვილმა განმარტა, რომ სოლიდარობის გამოცხადებას ის ვერავის აუკრძალავდა, თუმცა, ბრალდებულს დარბაზში წესრიგი უნდა დაეცვა.
“წესრიგი დავიცვათ, კორექტულობა გამოხატეთ. სხდომის დარბაზს რამდენად შეესაბამება ესაა მთავარი”, – განაცხადა იაშვილმა.
თბილისის საქალაქო სასამართლოში, 20 ივნისის საქმეზე დაკავებული პირების – ბესიკ თამლიანის, ზურაბ ბუდაღაშვილის, ცოტნე სოსელიასა და კახაბერ კუპრეიშვილის სასამართლო პროცესზე 16:00 საათამდე შესვენება გამოცხადდა. აღნიშნულის მიზეზი, ერთ-ერთი ადვოკატის გამოუცხადებლობა გახდა.