ვრცელდება ინფორმაცია, რომ ლუკა სირაძის შემდეგ თვითმკვლელობა გოგონამაც სცადა. ბექა დავითურის თქმით, ბავშვი საავადმყოფოში არ იმყოფება. კლინიკაში არ არის სკოლის არც ერთი მოსწავლე.
შეკითხვაზე, იმყოფებოდა თუ არა გოგონა, რომელმაც თვითმკვლელობა სცადა, დაკითხვაზე ლუკასთან ერთად, დავითური პასუხობს:”იქ იყო უამრავი ბავშვი”.
მწვანე სკოლის დირექტორი კახა დავითური არ უარყოფს, რომ შსს სხვა მოზარდის თვითმკვლელობის მცდელობასაც იძიებს. მისი თქმით, პოლიციის განყოფილებაში, გამოკითხვაზე”იყო უამრავი ბავშვი” და ემოციურად ყველა მათგანის მდგომარეობა მძიმეა. “ეს საკითხი და კიდევ სხვა დეტალები, არის გამოძიების თემა. მიცემულია უამრავი ჩვენება ამასთან დაკავშირებით. ჩემი ინფორმაციით, არც საავადმყოფოშია არავინ, არც არაფერი”, – თქვა დავითურმა
ჩვენი ინტერესია, რაც შეიძლება მალე დასრულდეს გამოძიება, -განუცხადა მან ჟურნალისტებს
“ვადასტურებ იმას, რომ ლუკას კლასელების მდგომარეობა იყო და არის ძალიან რთული. მოსწავლეები განიცდიან ამ ამბავს, ლუკა იყო მათი მეგობარი და ისევე, როგორც ჩვენთვის, მათთვის არის მძიმე. ყველა მოსწავლის შესახებ, მათი სულიერი მდგომარეობის შესახებ, სკოლის ფსიქოლოგის სამსახური საქმის კურსშია”,- განაცხადა კახა დავითურმა. .
“ რაც შეეხება იმას, რომ 112-ში დავრეკეთ, როდესაც ჩვენ ვნახეთ დაზიანებული სკოლა და უცხო ადამიანი სკოლის ტერიტორიაზე შემოსული, ვალდებულება გვქონდა პატრულისთვის დაგვერეკა. მე რომ მცოდნოდა ასე დამთავრდებოდა ეს ამბავი, სულ დაეწვათ ეს სკოლა, არ გამოვიძახებდი პატრულს, მაგრამ მე არ მინდა დემონიზება იმის, რომ რაღაც ინციდენტის შედეგად ჩვენ არ გამოვუძახოთ 112-ს“,- განაცხადა სკოლის დირექტორმა.
ჟურნალისტის კითხვაზე, გრძნობს თუ არა სკოლა პასუხისმგებლობას მომხდართან დამავშირებით, დირექტორმა განაცხადა, რომ “ისევე როგორც საზოგადოება, სკოლა გრძნობს პასუხისმგებლობას იმ მიმართულებით, რომ შესაძლოა, ბავშვების სულიერი მდგომარეობა გამოგვეპაროს”.